Reglar for bruk og oppbevaring av husdyrgjødsel, silopressaft og avløpsslam er heimla i Forskrift om gjødselvarer mv. av organisk opphav.
Del III i forskrifta omhandlar lagring og bruk.

Plassering av anlegg og avstandskrav for husdyrgjødsel og avløpsslam
Krav til ulike lagertyper
Spesielle krav til lager for husdyrgjødsel
Spesielle krav til lager for silopressaft

Gjødslingsplan
Spredetidspunkt
Spesielle krav til bruk av husdyrgjødsel
Spesielle krav til bruk av avløpsslam
Dispensasjon

Kap. 6 Krav til lagring

§ 18 - Plassering av anlegg og avstandskrav for husdyrgjødsel og avløpsslam
Lager for husdyrgjødsel og avløpsslam må ikkje plasserast slik at det medfører fare for forureining. Det må og takast omsyn til moglege luktplager.

§ 19 - Krav til ulike lagertyper
Lager for flytande gjødselvare skal ha tette konstruksjonar. Det er ikkje krav til tak, men gjødselkummar og dammar skal ha tilstrekkeleg heilårssikring, dvs. min 1,5 m frå terreng til kant av kum/gjerde. Kumvegg som når høgare enn 1,5 m over bakke skal ha klatreavvisar på toppen. Kum skal utstyrast med innvendig stigetrinn eller andre redningsinnretningar.

§ 20 - Spesielle krav til lager for husdyrgjødsel
Lager for husdyrgjødsel skal ha tilstrekkeleg kapasitet, og må minimum romme 8 månaders produksjon. Gjødsel frå utegardar og pelsdyrhald skal fjernast regelmessig, minst ein gong i året.

§ 21 - Spesielle krav til lager for silopressaft
Silopressaft skal samlast opp og lagrast slik at den ikkje fører til forureining eller fare for forureining. Ved nybygg, utviding og utbetring av siloanlegg skal tekniske retningslinjer fastsett av Landbruksdepartementet følgjast. Før anlegget vert teke i bruk skal det vere kontrollert og godkjent av kommunen.

 
Kap. 7 Krav til bruk

§ 22 - Gjødslingsplan
Bruk av husdyrgjødsel, silopressaft og avløpsslam skal inngå i gjødslingsplan, jf forskrift om gjødslingsplanlegging.

§ 23 - Spredetidspunkt  
Spreiing skal så langt det er mogleg skje i vekstsesongen frå våronnstart  til 1. september, forttrinnsvis om våren når planteveksten tek til. Det er forbode å spreie husdyrgjødsel, avløpsslam og silopressaft på snødekt og frossen mark, og i perioden frå og med 1. november til og med 15. februar.

§ 24 - Spesielle krav til bruk av husdyrgjødsel
Husdyrgjødsel kan berre spreiast på godkjent spreieareal (fulldyrka areal). Føretaket skal ha tilstrekkeleg disponibelt areal for spreiing av husdyrgjødsel, minimum 4 dekar fulldyrka jord pr. gjødseldyreining (GDE). (1 mjølkeku tilsvarar 1 GDE. For andre dyreslag sjå vedlegg 2 i forskrifta.) Kommunen kan etter søknad godkjenne anna areal enn fulldyrka jord som spreieareal. Utmarksareal kan ikkje godkjennast som spreieareal. Gjødslinga skal tilpassast arealet sitt gjødslingsbehov.

Spreiing utan nedmolding/nedfelling på eng og anna grøde skal gjerast så tidleg i vekstsesongen at det er moglegheit for betydeleg gjenvekst som kan haustast eller beitast, og seinast innan 1. september. Husdyrgjødsel spreidd på open åker skal moldast ned straks, og seinast 18 timar etter spreiing. Ved spreiing nær bustadar skal det takast rimelege omsyn til luktulemper og ulemper som følgje av partikkelspreiing.

§ 25 - Spesielle krav til bruk av avløpsslam
Slam kan ikkje spreiast på areal der det vert dyrka grønsaker, potet, frukt eller bær. Slike vekstar kan ikkje dyrkast på areal der det er brukt avløpsslam før minimum 3 år etter spreiedato. Slam må heller ikkje spreiast på eng. I private hagar, parkar, leikeareal og liknande må slam berre brukast som det av eit dyrkingsmiddel. Etter spreiing må slammet moldast ned straks og seinast 18 timar etter spreiing.

Ved bruk av slam må føretaket sende melding til kommunen seinast to veker før fyrste levering. Meldinga skal ha med vurdering av alle relevante forhold i samband med spreiinga, samt mengde, samansetjing, storleik og type areal det skal spreiast på. Kommunen legg meldinga fram for medisinsk-fagleg rådgjevar til uttale.

Dispensasjon
Kommunen kan i særlege tilfelle dispensere frå reglane om bruk og lagring, med unntak av visse reglar for avløpsslam, jf. Forskrift om gjødselvarer mv. av  organisk opphav.